العيش

العيش السهران
على طاولة عيش عند الفران
العيش اللى يسيب الرده
على مفرش كاروهات ومشمع
فى مائدة الرحمن
العيش اللى بيستنى المدفع
العيش اللى فى إيدك لقمه
تحت الطبلية ينام
على ركبة بنت مربعة وسط اخوات وقرايب
وفوقيهم صورة واحد غايب
العيش فى الجيش
عيش التعيين لجنود جعانين
العيش اللى بنجرى وراه وبيجرى ورانا
العيش اللى بيتفرق فى المولد
والعيش اللى يروح لأشرجية بيفطروا فى الشارع
العيش اللى يروح المدرسة والكيس النايلون فى الشنطة
العيش اللى بيستنى الأوتوبيس جوه الجرنان اللى مبقع زيت
العيش النعمه اللى نبوس بيه جبهتنا ونحطه جنب الحيط
العيش اللى فى صرة منصوره ورايحه لجوزها الغيط
العيش المترصص على ست سْبته راسيين بحوايه
على راس الولد اللى يسوق العجله
العيش اللى بيتقمر ومحروق
ويحب الجبنه البيضا والبطيخ والقته
العيش اللى بيعمل فته
والعيش اللى يغمس فول
العيش الصابح والعيش المبلول
العيش اللى يروح الجنه
والعيش البايت فى مشنه
العيش البايت فى العياشه
والملفوف فى قماشه
العيش اللى معشينا ومعيشنا
ومعشى أبويا وأمى فى زمن الحلميه
ومعشى جدودى الفقرا فى زمن الباشا
ومعشى فراعنة فجر الدنيا
متحنط ويا الموميا
العيش والملح
بينادوا لبعض
وينادوا علينا
تترج السما والأرض
ينزل شلال القمح يغطى الوادى
ويغطى الدلتا
يملا الأفران بدقيق وعجين
وتغنى جموع المصريين
لرغيف العيش

2004