حكاية الشمس مع ربّات البيوت
ربات البيوت صاحيين
عشان الشمس مواعداهم
حتقابل زكيّه على طرابيزة المطبخ وحتقابل فتحيّه على كنبة الصاله وفاطمه جنب المكتبه الرمادى ومنى مع القطه الرمادى وعصمت مع القطه الشيرازى ومارى فى البلكونه الورانيه وسوسن فى سوق الجيزه ورجاء على البسطه وبهيجه فى أودة النوم وروحيه وإنصاف ويسر واعتماد وليلى وكريمه فى الجناين والشبابيك والاسطح والمداخل
الشمس حتقعد معاهم كلهم
و كل واحده لوحدها
حتسمع منهم حكايات
وتاكل معاهم سندوتشات
وتشرب شاى بالبقسماط
وقهوه على السبرتايه
وتطبق ملايات وتقطّف ملوخيه وتفصّص وتقمّع وتقشّر وتنشّر فرش البيت وتخيّط شرابات
وحتعرف أخبار الأولاد
حتعد معاهم أيام فاضله على رجوع أمينه وعبد الحكيم وحسام
و حتفتكر وياهم أيام ما كان فؤاد بيطفى النور وبيتّاوب وصلاح بيدلّع ماما وينادى عليها من البلكونه وتيزه بديعه تجاوب على أسئلة الظابط بهدوء وافتخار وعامر بيقدّم لمحمد فى الابتدائيه
والتوهان والدوخه والسخونيه
والدكتور مجدى
ونجمة المغربيه وكسوفها من القمر اللى معدى
وسحابة الحب الوردى
والشجر الأحمر اللى بيخضرّ
والتمثيل الضوئى
والأفلاك
والمشوار اللى بتاخده عشان توصل للشباك
حتشيل وياهم العفار من على كراسى الصالون
حتسمع أبله فضيله
وتتناقش وياهم فى مسلسل إمبارح
الشمس جميله
حتجيلهم لابسه قميص النوم
ودراعاتها البيضا
بتقول الدنيا لسه بخير
وشعرها الناعم الأصفر الطويل
يشبه سلاسل الأحلام
وضحكتها اللى بتلعلع ... أنغام من أيام شجر الفاكهه وجنينه مش لاقيه نجيله
الشمس بتتدلع
الشمس اتلسعت لما اتدلقت كباية الشاى على وراكها
والبياعين ينادوا ع الخضار والفاكهه
وربات البيوت يضحكوا و عينيهم تدمّع
ويحطوا لها قشر بطاطس ويدهنوا لها بزيت
ربات البيوت حتتجمع من أنحاء الجمهوريه حوالين الشمس
يترجوها تبات ويّاهم
و تبات
فى سراير فوقها ناموسيات
يسهروا للفجر فى حكايات
جنبيهم سهرانه قزازة الميه والنضاره وطقم الأسنان ... والأدويه
علشان كده يا ولاد
الشمس ماهيش طالعه بكره الصبحيه
أمين حداد 2006
يا جمالك يا ريحة الحبايب.. أهلاً بيك يا أمين في الفضاء التخيّلي.. أيوة كدة خللي التخيُّل يحلوْ :-)
ردحذفشكراً يا عمر
ردحذفوعلى رأيك
لو كان غنايا بسيط
هيلف ويجيبك
أقرأ النص فتنكشف الروح كأنها سجادة فارسية عليها نقوش من الماضي ورؤى للمستقبل
ردحذفأتذكر الآن قصيدة قديمة لك كنت قد قرأتها..كنت تتكلم في نهايتها عن إطفاء النور بالقلم الرصاص.. أرجو أن تعيد نشرها
أنت جزء من ذاكرتي.. وامتداد شفيف لما يحمله الوعي من صور لا تُنسى
محبتي
شكراً يا ياسر
ردحذفالقصيده نشرتها فى دبوانى الأولانى ريحة الحبايب
اللى هو مش موجود قى أى مكان
و ان شاء الله حابعت لك القصيده
قصيدتك وزنت مع إحساسي بكراهية النسا اللي شاطت ف مجتمعنا وشممتني ريحة مصر بقوة مش معهودة بالنسبة لي غير ف حاجات قليلة قوي وحالات منها قصايد تانية ليك زي "الأسامي"، مصر الأُمّويّة اتبعثت ف قصيدتك يا أستاذ.
ردحذفعظيم.
"الأمومية" أحلى.
ردحذفدلوقتى فهمت يا حمكشه
ردحذفما كنتش فاهم حكاية الأمويه دى خالص
شكراً على تعليقك
أزال المؤلف هذا التعليق.
ردحذفأعذرني، الرابط وقع مني:
ردحذفhttp://en.wikipedia.org/wiki/Matriarchy
بس أنا مش متأكد مصر كانت ف يوم من الأيام أمومية سياسيا ولا لأ، بغض النظر عن حكم الملكات، لكن اجتماعيا ونفسيا شايف كدا. يعني مقابل الأبَوية بالظبط. لكن اللي اعرفه مثلا إن ف النوبة، قبل التهجير وبعده، تلاقي رجالة وأولاد وشباب ف البلد معروفين باسم أمهاتهم، لما تكون الأم أقوى وأكثر تأثيرا وبروزا عن جوزها غالبا، ويتقال دا باحترام مش تقليلا من الشأن خالص، إلا ف حالات نادرة وبعد التهجير بالخصوص.
يا عزيزي يا أمين
ردحذفما بعرف شو بدي قول
بس بعرف إنو بعد هالنّهار المتعب اليوم، و الّي كان قابضلي عقلبي، قررت أقرالك شي، كان أحسن قرار باخدو اليوم لأنو بعد طول انتظار، انفرجت أساريري... رحت على مكان و زمان آخريْن، رحت على إيام ما كنت زغيرة، وقت كون مريضة، فاغيب عن المدرسة، و أنبسط بتفاصيل هاللحظات (الي إنت ذكرتا بالظبط)و خاصّةللإحساس بشمس الصباح في بيتنا. كان يعجبني هالعالم كتير و إتمنى لو كل يوم فيني أمرض
شكراً لأنك ذكرتني أدّيه همومي زغيرة
قدّام بساطة الحياة
تأثير هالقصيدة بيشبه تأثير فيروز عليي وقت الشدة
أتمنى أن تشرفني في مدونتي الجديدة عامل حفلة على الضيق عازم فيها الحبايب كلهم ومفيش داعي تكلف نفسك وتجيب إي حاجه معاك كفايه هاتنور المدونة
ردحذفالله يا امين الله الله الله
ردحذفيه الدفا اللى فى القصيده الجميله دى
yurtdışı kargo
ردحذفresimli magnet
instagram takipçi satın al
yurtdışı kargo
sms onay
dijital kartvizit
dijital kartvizit
https://nobetci-eczane.org/
2XD
salt likit
ردحذفsalt likit
dr mood likit
big boss likit
dl likit
dark likit
5M4AR