ردّ الشجر
راح اشتكى للشجر اللى بيبدر حبوب اللقاح
قام الشجر قال له
احدف حنينك للرياح
حيرجع لك
بقى يعيّط فى البراح
و راح لصالة الوصول يستنّى
لقاها مليانه
نباتات زينه دبلانه
و رجلين بتشبّ
و رؤوس بتشرئب
و عيون قلقانه
و هوّ راجع شاف أكياس البلاستيك اللى مسافره
حايشاها الأسوار السلك
راح للشجر اللى بيحضن العصافير
قال له
خد من حنينك رحمه
والإنسانيه ... ضلة المحتاج
بعتر حنانه هنا وهناك ... من غير تدبير
ما كانش عارف ان الغلابه كتير
والقطط البردانه كتير
والكلاب السعرانه بتسوق بغشوميه
وبتدهس البشر المعديّه
راح للشجر اللى عامل سور
قال له اشتياقك سرّ
والبوح طلوع الروح
أما النخيل
قال له اللى بيهاجر بخيل
و أمّة الشجر الكريمه
هىّ اللى حافظه البريّه
كل شجره قالت له اللى فيه القسمه
شجرة لمون غلبانه
شجرة رمّان عيّانه
الجزورينه البهتانه
شجره عظيمه جداّ جداّ فى غانا
شجرة كافور قدام معسكر جيش
و أختها اللى فى طريق العبّاسه
أم الشعور
اللى بتسحر العشّاق فى الدِرا
و بتبكى فى انجلترا
القصد ... أصبح صاحبنا حبيب للشجر
بقى الشجر يسعى له
يرقد يغمّض عينيه
و يقول للأشجار تعالوا
تيجى تضلل عليه
افرحوا
غنّوا
يللا بقى روّحوا
لأ ... ما تمشوش ... استنّوا
والشجر يضحك حواليه
عرف السرّ اللى ما عرفوش حدّ بعده
يتخلص من أحزانه
و يحرّك الشجر من مكانه
شكرا يا حسام
ردحذفقلت القصيده دى امبارح فى ملتقى الشعر العربى مع تلات قصايد تانيين
و واضح انها مش جماهيريه أوى
أنا كل شويه بازور القيروانى وما بالقاش مدونات جديده
فى انتظار حكاياتك يا صاحب حكايات أمينه الرائعة
أزال المؤلف هذا التعليق.
ردحذفطبيعي متكونش جماهيرية يا أمين.. عُمْر الشجر في بلدنا ما كان رايج، بس روّجتني بصحيح :-)
ردحذفالله يا أمين.. استمتعت بقرائتها تاني. عارف.. ممكن تكون انت بس قريتها وانت مش مطمئنلها عشان كده ما اندمجوش معاها. أنا عاجباني جدا جدا جدا
ردحذف:))
راح اشتكى للشجر اللى بيبدر حبوب اللقاح
ردحذفقام الشجر قال له
احدف حنينك للرياح
حيرجع لك
قبل ماوصل للي بعدها كانت عينية دمعت بجد ..
شجرة لمون غلبانه
شجرة رمّان عيّانه
الجزورينه البهتانه
شجره عظيمه جداّ جداّ فى غانا
شكرا جدا علي الايضاح :)
الله الله يا فنان
سمعنا .. قول كمان..
بس أنا زعلانة
اني ماكنتش هناك،
القصد ... أصبح صاحبنا حبيب للشجر
بقى الشجر يسعى له
يرقد يغمّض عينيه
و يقول للأشجار تعالوا
تيجى تضلل عليه
كان لازم اكون هناك :)
يا فاطمه
ردحذفشكرا على التعليق اللى مليان شاعريه من شاعره جميله زيك
بس أنا مش فاهم هناك فين ؟
ممكن توضحى لى قصدك ايه؟
قلت القصيده دى امبارح فى ملتقى الشعر العربى مع تلات قصايد تانيين
ردحذف******
لو كنت أعرف، كان زماني أول الحضور
ان شاء الله المرة الجايا أكون موجودة :)
..
القصد ...
أصبح صاحبنا حبيب للشجر
بقى الشجر يسعى له
يرقد يغمّض عينيه
و يقول للأشجار تعالوا
تيجى تضلل عليه
..
النهاردة
ف الطريق من بيتي للكلاس
فوق الرصيف كت رافعة راسها
بتشاورلي علي كام سطر نايمين جوايا
وبكل ألاطة
تتمايل ..
والنسمة معايا
بتتحايل..
تتراضي..
وتصحي الريح ..
تتقلب فأغصانها العريانة
تعزف سطرين،
وتدندن ف وداني
النعسانة
،وبنغمة صوفية
تصحي ف ملامحي
لوحة أصلية
كانت غفلانة
...
يسلم لي عودك.
ردحذف