الخميس، فبراير 28، 2008

على لسان الينت

الواد ده حيرجع تانى يقوللى أغانى باينه زباله
الواد ده ضايع طحن وعامل فيلم مثقف على روشنه وعينيه بتشر سفاله
أنا بعد ما سابنى عجبنى قعادى لوحدى اديتها دماغ أنتخه من غير رجاله
وطحنت فى أكل ورز ومحشى وتورته كتير جداً بهباله
ورجعت أروح النادى وشفت هنادى وسارة وهاله
وشيرين ودتنا الساحل خدنا يومين فى مارينا ويوم فى العجمى ويوم فى غزالة
ورقصنا مارينجى وصلصا مع عثمان وكريم محمود وكريم دربالة
وحلقت لرامى وكان قدامى وبقى مبلول وفى أنيل حاله
علشان واقف بيسيح لجيرالدين مع عمرو شاهين بغباء ورزاله
وقعدت ساعات أتشات وبعتّ إيميل بالليل لجميع الشله انا هنا فى الفيللا ... قاعده لوحدى ومكبرة جمجمتى وعايشه حياتى وقافله موبايلى ومش بطاله
ولو فكرتوا تعطوا فى حته أو تتركنوا فى حفلة تكنو أو تنزلوا فاقوس مع مينا أو كلنا نطلع على سينا ... أنا شغاله






هناك 5 تعليقات:

  1. ايه ؟
    حضرتك بتجرب تكنييك جديد ولا ايه ؟
    انا شايف انها تقريبا زي اللي قبليها نفس الشكل
    .
    .
    لكن يبقي فيها خفة دمك المعهودة
    تحياتي
    والسلام

    ردحذف
  2. ههههههههههههههههههههه

    .
    .
    .
    جااااامـــدة...آآآخر حاجة :)

    ردحذف
  3. شعر سبور...شعر اليومين دول...كأن انا اللى بكتب...كأن شاب او شابه عندها 20 سنه بيكتب او بتكتب...اذا كان هناك شعر يجسد مصطلحات والفاظ وثقافة عصر...فان هذه القصيده ستكون افضل مثال لرصد واقعنا اليوم....هذه القصيده بمثابة ثوره حقيقيه فى الشعر للكاتب امين حداد...وما حييت سأبقى اشكره عليها...لانه اقترب بها كثيرا من عقلى وعقل غيرى الكثيرين من جيل العشرين الذى لا يقترب منهم الكبار ..ولكن انصفنا امين حداد...والله حرام حرام...امين حداد مش واخد حقه فى مجتمعنا....حرام..اكبر حرام...ليه امين حداد لم يتصدر الفضائيات والصحف ...
    حرام...لان هذه السلاله لم تتكرر كثيرا...اقولها وقلبى يحترق...سلامو عليكوا

    ردحذف