الثلاثاء، يناير 15، 2008

الأسماء

عبد السلام أحمدين صالح زناتى جاد
شخصية بيرم كتبها فى قصة زجلية
سيد محمد محمد إبراهيم شدّاد
واحد موظف قديم فى هيئة حكومية
كاظم شيرين البحيرى إسماعيل توحيد
وزير مفوض فى أمريكا الجنوبية
شديد محارب مجلّى عبد ربه شديد
صعيدى شايل تراب ضمن الفواعلية
خليل سعيد مرشدى عبد الجليل محبوب
غفير نظامى اتقتل بالليل فى دورية
فهيم جنينة نديم المنتصر أيوب
طبيب ممارس عام أطفال وجلدية
أيمن وأمجد ربيع رشوان عنب كارم
أخين توائم فى مدرسة السعيدية
عثمان زكى عثمان زكى زكى سالم
نزيل فى سجن القناطر تهمة سياسية
جرجس شحاتة أديب قسطندى عازر عيد
دكتور مهندس فى هندسة المنوفية
خلدون شبانة جزر نظمى قمر بوسعيد
شخصية ما اعرفهاش . شخصية وهمية
فرج استيفان كتكوت شلتوت نسيم عطوة
أبو المحاسن أبو القمصان أبو خطوة
سيد عفيفى على نادر عزيز تعلب
عبد المجيد فرغلى فارس عوض سحلب
شاهر سمير الشبكشى جاسر الشواف
حازم جمال السنوسى المرتضى خلاف
ناجى فريد الطناحى حسين أبو رية
أسامى فيها عرق ودموع وحنية
أسامى تنطق كلام بلسانى وعينيه
شهداء تراب الوطن والزرع والميه






هناك 8 تعليقات:

  1. اتابع كل حرف تكتبه بشده وبشغف..انتظر أعد الليالى تفوت...كى أقرأ لك جديدك ... قصيدة الاسامى من وجهة نظرى ... ابتعاد قليلا عن نهجك واسلوبك الشهير ... الا وهو مزج شعر التفعيله مع الشعر النثرى ..وانت احد رواد هذا النوع لان المزج عندك يشبه الى حد كبير بالضفيره ... قصيدة الاسامى حاله من حالاتك المزاجيه المنعشه... حاله من حالات الروقان لديك .. ويبدو ان الروقان موصول بالوراثه حتى مع اخونا الجميل احمد حداد....قصيدة الاسامى معبره حتى كل اسم كان له تعبير .. يوجد عبقريه وموسيقى فى كيفية تركيب وترتيب الاسامى ... أستطيع ان ابصم لك بالعشره ... لانك تستطيع ابراز واظهار شخصيتك من خلال شعرك ..شكرا عم امين حداد...هذا الاسم الغالى...

    ردحذف
  2. اهو ده يا عم امين سحر الشعر
    الطاقه ال بتطلع م الكلمه
    وال انت سيدها طبعا
    مش محتاج اقولك ان طاقات الاسامى وتركيبهافى النسق ده
    جهد بسيط عليك
    وسمع مثقل على حد بيفصص الكلام بعديك وصولا لمعادلات سحره

    ازمتى الوحيده بس فى النهايات
    غالبا انا شخص معقد
    وياريتك تقولى ردك على ده
    ان كان كفايه انى اعرف من طاقه نسق الاسامى ال انت عايز تقوله بدون الخوض فى النهايه دى
    أسامى فيها عرق ودموع وحنية
    أسامى تنطق كلام بلسانى وعينيه
    شهداء تراب الوطن والزرع والميه

    لانها وصلت وده مش ضد الاختزال اعتقد لأ ده ضد الحس
    انك تحجر على مشاعر حد فى الغالب هيوصل لفهم ده
    وهنا بتدخل قلمك لحذف المناطق ال ممكن تخلى القاريء كان خلاص اترمى جوا حاله السجل المدنى ال انت خلتها سحريه ولا جوزيه سارماجو فى رواية كل الاسماء نفسها
    بدون ماتكون وصفت حاله دخولنا السجل ده


    صباح الفل
    بلال

    ردحذف
  3. بصراحه رغم البساطة الشديدة الا انها في غاية الروعة احب احييك بشدة عليها

    وياريت تقبل طلبي في اني اضم القصيدة دي لبلوج
    ف العتمة هنور شعر
    لو حضرتك موافق يشرفني جدا اني اخد شوية تفاصيل عن حضرتك كشاعر وتنور معانا في العتمة
    تحياتي يا فنان

    ردحذف
  4. القصيدة دي دلوقت بتقلب المواجع :) :(

    ردحذف
  5. لا أجد تعليق أكثر مما كتبة بلال فضل
    لأرواح شهداء العاشر من رمضان العطرة الطائرة فى ظلال عرش الرحمن نقرأ الفاتحة ثم نهدى لهم هذه القصيدة لعلها تؤنس أرواحنا المعذبة الزاحفة فى ظلام الحزب الوطنى.

    ردحذف
  6. ما فهمنا شيء من هذه اللي سميتموها قصيدة؟ يا ريت حدا يشرح لنا!!!!

    ردحذف
  7. http://www.youtube.com/watch?v=CjITJzKigD0&list=UUjl6Wtrf3TM8IOndqThFckw&index=1&feature=plcp

    ردحذف
  8. صورتها في حفلة جامعة القاهرة في أداب انجليزي
    :)
    حبيتها جدا
    تحياتي

    ردحذف