الورطة
أنا متورط
جاتنى قصيده ومش عارف أتلم على كلامها
تعرف إيه اللى يساعد
أصعب على نفسى كأنى حاموت ... واتشاهد
تطلع كلمه تصهلل جوايا
تنزل دمعه ... تجرّ كلامها
دلوقتى حامدّد جسمى واغمض عينى واسيب الضلمه تجيب اللى تجيبه
شايف إيه؟
فيه عربية ترمس وعليها قراطيس تتشكل نخله جميله من ورق الكراريس
ايه كمان
سن قلم جاف واقع والأنبوبه طافحه و مغرّقه صوابعى والصفحه
غيره
شبشبى اتقطع وانا ماشى
غيره
سحب راسمه على السما حيوانات بس ما بتمشيش بتكبر وتحبل وتمطر فى مكانها
ايه كمان
قاعد على رصيف عباس العقاد أو جامعة الدول بابيع براويز
وعيونى ما بتطلعش للسما
ودموعى ما بتنزلش للشهداء
وجراحى ما بتنزفش ... وانا متشرح
واللى بيفرحنى ... مش بيفرح
وانا بانادى على البضاعه واقول
ما توحشونيش يا ميتين
يا ميتين بالقوى
انا ما استاهلش الطيابه
يا ميتين غلابه
اوعم تجونى
انا لا استاهلكم ولا تستاهلونى
ولا ولادى يستاهلوا المستقبل المتكهرب
ولا نسيم العصرية انه يتغرب
ولا العيش الصابح يستاهل عادم السيارات
ولا الأغانى القديمه تتبهدل فى الإعلانات
ولا الشباب اللى لابسين أراجوزات قدام محلات الهامبورجر
ولا الليالى اللى لمتنا تستاهل سيجارة البانجو
ولا صدر أمى يستاهل الدخان
ولا الصباح للكسل
ولا قلبى للعدوان
أنا ما استاهلشى دموعى يا حضرات
وما استاهلشى قصيده تتسحب وتخنقنى
وانا سهران على سريرى بعد الضهرية
و روحى تحت مخدتى متنيه
و عمرى متلخبط
وانا متورط
فى قصيده ومش عارف أكتبها
2004
جاتنى قصيده ومش عارف أتلم على كلامها
تعرف إيه اللى يساعد
أصعب على نفسى كأنى حاموت ... واتشاهد
تطلع كلمه تصهلل جوايا
تنزل دمعه ... تجرّ كلامها
دلوقتى حامدّد جسمى واغمض عينى واسيب الضلمه تجيب اللى تجيبه
شايف إيه؟
فيه عربية ترمس وعليها قراطيس تتشكل نخله جميله من ورق الكراريس
ايه كمان
سن قلم جاف واقع والأنبوبه طافحه و مغرّقه صوابعى والصفحه
غيره
شبشبى اتقطع وانا ماشى
غيره
سحب راسمه على السما حيوانات بس ما بتمشيش بتكبر وتحبل وتمطر فى مكانها
ايه كمان
قاعد على رصيف عباس العقاد أو جامعة الدول بابيع براويز
وعيونى ما بتطلعش للسما
ودموعى ما بتنزلش للشهداء
وجراحى ما بتنزفش ... وانا متشرح
واللى بيفرحنى ... مش بيفرح
وانا بانادى على البضاعه واقول
ما توحشونيش يا ميتين
يا ميتين بالقوى
انا ما استاهلش الطيابه
يا ميتين غلابه
اوعم تجونى
انا لا استاهلكم ولا تستاهلونى
ولا ولادى يستاهلوا المستقبل المتكهرب
ولا نسيم العصرية انه يتغرب
ولا العيش الصابح يستاهل عادم السيارات
ولا الأغانى القديمه تتبهدل فى الإعلانات
ولا الشباب اللى لابسين أراجوزات قدام محلات الهامبورجر
ولا الليالى اللى لمتنا تستاهل سيجارة البانجو
ولا صدر أمى يستاهل الدخان
ولا الصباح للكسل
ولا قلبى للعدوان
أنا ما استاهلشى دموعى يا حضرات
وما استاهلشى قصيده تتسحب وتخنقنى
وانا سهران على سريرى بعد الضهرية
و روحى تحت مخدتى متنيه
و عمرى متلخبط
وانا متورط
فى قصيده ومش عارف أكتبها
2004
عارف يا أستاذ أمين يا بن الغالى ساعات الواحد من كتر همه ما بيلاقيش مخرج غير القصيده و ساعات لما الهم بيكتر بيعصى الكلام بس اللى مش سهل أبدا إن الواحد يقدر يصعب على نفسه بصدق و ما يكونش بيستدعى الحاله و خلاص . بيتهيألى الحكايه دى عايزه صفاء يقرّب من صفاء الأوليا.
ردحذفلما غمضت عينك و بدأت الصور تحضر من أولها لحد ما وصلت رصيف عباس العقاد كل الصور دى شفتها و انا صغير زيك بالضبط لكنى كنت نسيتها بس انت فكرتنى بيها و رجعتنى لأيام ما كنت لسه قادر أشوف الحاجات مش بس بطريقتى لكن كمان ببراءه.
تعمل إيه يا أ/ أمين ف اللى عمره ما داق لمة الليالى اللى انت بتقول عليها .. و الله إنتوا محظوظين قوى معشر مصر القديمه
.
" و انا سهران على سريرى بعد الضهريه "
قد كده اليوم كله ليل ، الصوره رائعه بس صعبه على النفس قوى.
و أخيرا أنا متشكر ليك لأنك قررت تعمل مدونه و تورينا إحساس اللى عاش زمنين
أنا باحب القصيدة دي قوي... وزي حاجات كتير انت كاتبها، باحس ان انا اللي كاتباها! مع إنها بتكون شبهك جداً ومرتبطة جداً بيك.. لكن وانا باقرا باحس ان الكلام ده طالع مني أنا..
ردحذفوعيونى ما بتطلعش للسما
ودموعى ما بتنزلش للشهداء
وجراحى ما بتنزفش ... وانا متشرح
واللى بيفرحنى ... مش بيفرح
وانا بانادى على البضاعه واقول
ما توحشونيش يا ميتين
يا ميتين بالقوى
انا ما استاهلش الطيابه
يا ميتين غلابه
اوعم تجونى
انا لا استاهلكم ولا تستاهلونى...
تعرف انا عايزة اشكرك مليون مرة على انك دخلت عالم التدوين و على كل قصيدة بتكتبها هنا فمتستغربش المرة الجاية لما تلاقيني مش كاتبة تعليق اصل كلامك ميستهلش غير مليون شكر ليك انك كتبته هنا
ردحذفI know this is not what you want to hear, but... "feek min ree7at abook"!
ردحذفI know you aim to be independent and have a seperate "style".. bas mafeesh fayda! Jeenaaaaat :-)
love your work :-)
آي نعم.. انا مستاهلش دموعي يا حضرات، ويا ريت الورطة ع القصيدة وبس يا أمين.. يا ريت
ردحذفمحمد أبو الفتوح :
ردحذفشكرا على تعليقك وهو الشعر كده ساعات بتبقى سكته انّك تقسو على نفسك
والحقيقه انى فى القصيده دى بالذات مش بابكى على الماضى بس زعلان من الحاضر
يا ساميه:
انا باتبسط جدا لما بتقولى ان شعرى بيعبر عنك
توته توته
كلامك جميل ... أنا اللى متشكر ليكى ... وعلى فكره أنا مش حاسس نفسى مدون أنا بانشر هنا قصايد كتبتها على فترات مختلفه وحاسس انى فاتح دكانة قصايد الناس بتيجى تقراها وتبتسم أو تعبس أو تدينى اللى فيه القسمه
arfana
المهم انك حبيتى الشغل
عمر مصطفى
عندك حق
بس اللى حصل فى القصيده دى انها هى اللى ضحكت علىّ وورطتنى فى كل المشاكل
النهاردة كان يوم مليااااان، أخدت أعلي درجة في الكلاس، وعملنا بارتي وداع للدكاترة البريطانيين، وبكرة أجازة، وهنام براحتي، وهمضي عقد الجامعة قريب، حاجات كتير حلوة حصلت النهاردة، بس أحلي حاجة حصلت بجد.. اني قريت القصيدة دي..
ردحذفأنا ما استاهلشى دموعى يا حضرات
وما استاهلشى قصيده تتسحب وتخنقنى
وانا سهران على سريرى بعد الضهرية
و روحى تحت مخدتى متنيه
و عمرى متلخبط
وانا متورط
فى قصيده ومش عارف أكتبها
كل الصور التحفة دي والتكثيف العبقري في المعاني ومش عارف تكتبها
امال لو كنت كتبها كان ايه اللي حصل بس :)
يا بنت الحياة
ردحذفمبروك أعلى نمرة فى الكلاس
وإن شاء الله تبقى دايماً مبسوطة
برده رائع جدا ومدهش.....بس مش عارف ليه القافيه مش متفقه فى بعض الاحيان...هل طريقة كتابة القصيده كده؟.....ياريت تعلمنى يا عم امين انت مش بتظبط قافيتك ليه؟....علمنى ارجوك لانى بكتب برده وعايزك تسمع قصايدى....
ردحذفموقع جديد للشاعر الجميل فؤاد حداد
ردحذفبه تجميع للعديد من نصوص أشعاره
كذلك يمكنك تحميل عدد من أجمل الأغاني الخاصه به
http://www.foadhaddad.somee.com/
و شكرا
منقول من موقع
ردحذفhttp://www.foadhaddad.somee.com/
التاريخ : الجمعة , 02/11/2007 , 01:37
الاسم : kamal shahat
kshahat2001@yahoo.com
التوقيع : mobile No
الاخ العزيز لو تكرمتم أرجو تليفون المهندس أمين حداد لأني زميل قديم له وأريد الاتصال به ولكم حالص تحياتي مهندس كمال الشحات
وعيونى ما بتطلعش للسما
ردحذفودموعى ما بتنزلش للشهداء
وجراحى ما بتنزفش ... وانا متشرح
واللى بيفرحنى ... مش بيفرح
شكرا!!