سبعة امتار
فاكره أول مره
طلعنا فيها الجبل
ولّعنا نار
وفضلنا نتكلم لحد خيط النهار
هوَّ احنا كنا سوا ؟
والا أسراب النجوم اللى حطت ع الجبل فجأه
لمّتنا من مكانين بعاد فى الأرض
لمتنا من زمانين بعاد عن بعض
طب فاكره أول مره بصيت لك
أنا كنت نايم ع السرير الصاج
و كنتى جايه فى يوم ماهوش جمعه
و فضلت أقولك قصيدة حب بتشوك
من غير ما اقولك إنها عنّك
و ضحكتى ضحكه منوره بألوان
و اتنطورت فى الأوده ... ورد و فل و بنفسج
و رجعت ابص على زراير بيجامتى
مكسوف و متلجلج
هو احنا كنّا سوا ؟
والا افتكرت ان القمر .. إنتى
طب فاكره يوم فى المطر بالليل و شبّوره
و فاكره يوم ما اتقابلنا صدفه فى الشارع
و يوم ما جدّك مات و جيتى الصبح و سمعتك ...
... من ورا المكتبه
طب يوم ما غنيت لك أغانى فريد
و يوم ما رحنا شقتنا الجديده
و يوم ما سيبناها
و يوم انقطاع النور عن القاهره
و يوم ظلام القاهره فى الضهر
أيام كتير فى الذاكره
عايزك تقولى بجد
أنا أصلى مش متأكد
هو احنا كنّا سوا ؟
أنا فى الهوا ماشى
بعيد عن الأرض بمسافة سبعة امتار
و بعيد عن الدنيا بسبعة امتار
و بعيد عن الآخره بسبعة امتار
ماشى بدموعى و حالتى ما تطمنش
لكن باحوم ع العش
مستنى منِّك إجابه
بعيد عنّك ....
.... أنا ما باعيشش !
أمين حدّاد
2003
الرسم المصاحب للفنان سمير فؤاد
ya Amin ana ma 3ereftech akra2 al kelma al akhira.ana ma ba 3aishash? Mona
ردحذفالكلمة الاخيرة انا مابعشش
ردحذفيعني مش بعرف اعيش او انا بموت
بعيد عنك انا بموت
قصيدة حب بتشوك
الكلمة دي نكشتني
shokran Said ala al tawdih!qasidah munassaba ma3 koudoum Al Rabi3!! raqiqa geddan ya Amin
ردحذفAlllllllllaaaaaaaaaaaaaaah
ردحذفكنبت عنك وعن القصيده دى وذكريتها معايا فى الفيس بوك ياريت لو عندك
ردحذفتعملى Add
الأسم: Mina Nagy
Network: German University in Cairo
Egypt,
شكراً ليك على القصيده دى بالذات!!
ما بزهقش من القصيدة دي , بعشقها , من القلب للقلب طالعة
ردحذف