الأربعاء، نوفمبر 14، 2007

الكتاكيت

أيام زمان كان الزمن صغير والأيام مش كتير ، واللى الزمن يضحك له يشرب من الغدير ، واللى مش عاجبه يشرب من البحر.
دلوقتى الزمن معجز وأيامنا زادت ، زى الفرخه اللى باضت ، وفقست الكتاكيت و فاضت على الكره الأرضيه.
زمان ... كانت الأيام زى الكتاكيت الصفرا اللى بتبات فى الصندوق و سَمَاها طرحه بيضا قديمه ، وتصحى تلعب فى الشمس وتكبر بالراحه.
اللى يموت منهم بيموت.
واللى يعيش منهم بيعيش مبسوط.
مبسوطين بالعشه الخوص ، وبالست العجوزه اللى بترميلهم البرغل وتغوص .. فى أحلامها ، قاعده معاهم فى الشمس ، تكلم نفسها ، وتنادى على ابنها اللى اتسجن سنة تسعه وخمسين.
دلوقتى الست دى ماتت وابنها مدفون بعيد عنها.
والايام بقت كتاكيت بيضا بتكبر فى عشرة ايام ، وفجأة تتنفض ، يطير من على جسمها الريش ، وتدهن نفسها بالبيض والبقسماط ، وتنط فى فى حمام سباحه مليان زيت مغلى.
علشان كده اليومين دول ... الكتاكيت مليانه كوليسترول.
نرجع زمان أكتر ...
الست اللى قلت لكو عليها كانت بنت قاعده على باب الدار فى عزبة دقدوقه ومعاها عصايه ، بتنكش فى التراب وتبص على الكتاكيت اللى فى البراحايه ، الكتاكيت منطلقه ومش خايفه من الفِرّه ، والحياه من حواليهم كانت بروفات مستمره ... لحياه تانيه خالص ، حتتمثل بعد ميت سنه فى التليفزيون.
يعنى ثورة تسعتاشر .. كانت بروفه لمسلسل خمسه وأربعين يوم
يعرض فى رمضان والعيد
والسته البيض
والسته المش عارف ايه
والثوره العرابيه كذلك.
ودنشواى ... شرحه.
و أدهم الشرقاوى وسيد درويش ومحمد فريد وأبطال الحواديت وناعسه وأيوب وإسماعيل مهيوب والمندوب السامى حتيقابلوا جميعاً فى مدينة الإنتاج الإعلامى ... بعد عمرٍ طويل.
أيها الساده ...
الآن .. التاريخ متوفر فى جميع الأعمال الفنيه ، ممكن تشوفوه بعد الفطار ، وبعد اختفاء نشرة الأخبار – فى القنوات الأرضيه - ، واختفاء الكتاكيت الصفرا , وعمل طفره فى صناعة الأغنيه والكليبات.
أكثر من ذلك ...
البنت اللى على عتبة الدار ، قامت وعجزت فجأه فى الحلقه الأخيرة فى المسلسل والكتاكيت دخلت مجال الإعلانات.
والأيام بقت مكعبات ، تطبخ بيها الست العجوزة ، ودموعها تشبه زمان لما كانت بتعيط مع صوت زمارات الإنذار وضرب الطيارات فى سبعه وستين وتنادى على ابنها زى المجانين. وتشبه دموعها أيام حفر القنال وبنا الأهرامات.
الست فى المطبخ دموعها بتسأل يا ترى كام عيل ماتوا
والملك فى المسلسل بيعيط على أمه واخواته
بعد ما عاش حياته
على رصيف متدارى فى شوارع التاريخ
رجع و خد دور البطوله غصب
من فلاحين على طول الوادى والدلتا
ومن عمال التراحيل
ومن الطلبه اللى ماتوا على كوبرى عباس
ومن اللى عاشوا وقاموا بالثوره المصريه
أيها الساده
التاريخ اللى فى التليفزيون ماشى على السجاده
وسقفه نجف عالى
وفى وشه كشافات بتلالى ... وكاميرات بتسجل
وتاريخنا احنا
ايده بتطب العجين
ورجله غارزه فى الطين
وعنده بلهارسيا
بس ما بيموتش
عايش وحيعيش
هوّ اللى قال
اللى ييجى فى الريش بقشيش
والكتاكيت اللى بتلقط رزقها من كفه حترجع له
ومش حتموت من أنفلوانزا الطيور
والباشوات حتركع له
والزمن بيدور
و بيضحك و بيلعّب حواجبه
وبيقول للى مش عاجبه
اشرب من البحر.

أمين حداد

هناك 14 تعليقًا:

  1. وتاريخنا احنا

    إيده بتطب العجين

    ورجله غارزة في الطين

    وعنده بلهارسيا

    بس ما بيموتش

    عايش وحيعيش


    الكذب مهما طالت حباله قصيّره

    واحنا سلسال يا أمين مابينتهيش

    ردحذف
  2. يا نهار اسود اية ده يا استاذ امين

    مصر بلدنا ليها تاريخين التاريخ اللى بتكتبه على الورقة والتاريخ التانى هو الورقة الورقة اللى ياما اتكتب عليها من التاريخ حكايات فيها اللى يقيم الظهر وفيها اللى يجيب القهر
    الحبر احمر او ازرق لون سجاجيد القصور وبيوت مراكز القوى وبيوت اللى سافروا الخليج وعمر محد فينا حس بالورقة اللى ياما شربت من الحبر حكايات مع ان الحكايات دى لونت الورقة بميت لون لدرجة ان ورق كتب التاريخ النهارده باقت مشجرة لكن مثقلة لكت ضعيفة ومهترأه

    ردحذف
  3. والحياه من حواليهم كانت بروفات مستمره ... لحياه تانيه خالص ، حتتمثل بعد ميت سنه فى التليفزيون.
    يعنى ثورة تسعتاشر .. كانت بروفه لمسلسل خمسه وأربعين يوم
    يعرض فى رمضان والعيد
    والسته البيض
    والسته المش عارف ايه
    والثوره العرابيه كذلك.


    رائعة جداً جداً
    أول مرة أخد بالي فعلاً
    الحياة الللى عايشينها دلوقتي هتكون بروفه لمسلسل او فيلم هيتعمل سنة 2108
    بس إحنا مش هنحضر أول عرض
    البروفه و بس

    تحياتي لحضرتك

    ردحذف
  4. ماشى الكلام :)
    طبعا مش جى أكد إن القصيدة روعة أظننى عديت المرحلة دى :)
    شامم ريحة الكوميديا السودة اللى ف ميت بوتيك والعيار الفالت من القصيدة ولا أقصد أى معنى سلبى ممكن أن يعتقد فيه :)
    لكن أنا بأسجل ملاحظة صغيرة:
    الطريق ما بين باشوات بتركعنا وبتكتب تاريخها الزائف وبين باشوات بتركع لنا لازال مقطوع ومحتاج وصل أكتر من كده فى رأيى

    تحياتى :)

    ردحذف
  5. Eh el 7alawa dee ya abo maeen
    shohdy

    ردحذف
  6. alaaaaaaaaaaaaaaaaaaaaaaaah dy 7elwa awyyyy .. tab3an ya sahrawardy kolena mota2asereen be fo2ad haddad .. bas ana mashametsh feeha ree7et el dawaween dol bezat la2en fo2ad haddad re7to hatla2eeha fy ay aseeda aw gomla 3ameya le ay sha3er masry .. bas elly ana shayfo hena howa osloob amin haddad el khas el gedeeed elly isa. haye3mel haga gedeeda fel she3r el masry

    ردحذف
  7. ولما الكلام يخرج من القلب بيلاقي قلوب تانه مستنياه تتلقفة وتنميه وترعاه...
    كلامك دافئ نابض حي بطعم الايام الجميلة....

    حالص تحياتي

    ردحذف
  8. shokra 3am amin haddad wa law ana za3lan mnk 3lashan ma 2aretsh kasaedy

    ردحذف
  9. لكل محبى الشعر العامى
    فى شاعر جديد تحفه يا جماعه اسمه حليم
    وادي لينك البلوج بتاعه
    http://www.2admnafsk.blogspot.com/
    ياريت تدخلوا وتعلقوا

    ردحذف